helpline khabar

आज १९ औं गणतन्त्र दिवस,देशभर बिविध कार्यक्रम गरी मनाइँदै

4 दिन अगाडी

News by: helpline

Shares: 14

काठमाडौं । आज १९ औं गणतन्त्र दिवस,देशभर विविध कार्यक्रमको आयोजना गरी मनाइँदैछ ।

विसं २०६५ जेठ १५ गते जननिर्वाचित संविधानसभाको पहिलो बैठकद्वारा २४० वर्षदेखि नेपालमा कायम रहेको निरङ्कुश राजतन्त्रको अन्त्य गरी सङ्घीय लोकतान्त्रिक गणतन्त्र घोषणा भएको थियो । सोही ऐतिहासिक दिनको सम्झनालाई चिरस्थायी बनाउन गणतन्त्र दिवस मनाउने गरिएको छ । नेपालमा संघीय लोकतान्त्रिक गणतन्त्रात्मक शासन व्यवस्था प्रारम्भको दिनलाई गणतन्त्र दिवसको रूपमा मनाउने गरिएको हो । सरकारले सो अवसरमा आज शुक्रबार सार्वजनिक बिदा समेत दिएको छ ।

सैनिक मञ्च टुँडीखेलमा आज बिहान गणतन्त्र दिवस विशेष समारोह आयोजना हुँदैछ । सैनिक मञ्चमा बिहान ८ बजेदेखि शुरु हुने समारोहमा राष्ट्रपति, प्रधानमन्त्री लगायत विशिष्ट व्यक्तित्वहरुको सहभागिता रहने भएको छ । समारोहलाई राष्ट्रपति रामचन्द्र पौडेलले सम्बोधन गर्नुहुने भएको छ । गत वर्षहरुमा राष्ट्रपति सहभागी भए पनि प्रधानमन्त्रीले सम्बोधन गर्ने परम्परा थियो । तर यस वर्ष प्रधानमन्त्री बालेन्द्र शाहले सम्बोधन नगर्ने हुनुभएको छ ।

उहाँले गणतन्त्रको प्रतीक राष्ट्रपति भएकाले राष्ट्रपति पौडेललाई नै सम्बोधन गर्न अनुरोध गरेर शीतल निवासमा पत्र पठाउनुभएको थियो । प्रधानमन्त्रीको सचिवालयले सैनिक मञ्च टुँडीखेलको कार्यक्रममा प्रधानमन्त्री जाने तर समारोहलाई सम्बोधन नगर्ने जनाएको छ । विश्वमा अभ्यासमा रहेका शासन व्यवस्थामध्ये लोकतान्त्रिक गणतन्त्र सबैभन्दा उत्तम भएकाले जनताको जीवनस्तरमा सुधार र राष्ट्रको समृद्धिका लागि बलियो अस्त्रका रूपमा रहेको छ ।

गणतन्त्रको १८ वर्ष पूरा भई १९औँ वर्षमा प्रवेश गरिरहँदा नागरिकका अपेक्षाहरू अझै बढेका हुन् । राजनीतिक अधिकारको प्राप्तिपछि अब आर्थिक समृद्धि, सुशासन र नागरिकको जीवनस्तरमा सुधार ल्याउनु नै गणतन्त्रको मुख्य कार्यभार र चुनौती देखिएको छ।