helpline khabar

समुन्नत समाज निर्माणमा आ–आफ्नो क्षेत्रबाट योगदान पुर्‍याउन राष्ट्रपतिको सबैमा आग्रह

4 दिन अगाडी

News by: helpline

Shares: 11

काठमाडौं । राष्ट्रपति रामचन्द्र पौडेलले सभ्य, सुसंस्कृत तथा समुन्नत समाज निर्माण गर्न आआफ्नो क्षेत्रबाट योगदान पुर्‍याउन राजनीतिक दल, नागरिक समाज तथा सम्बद्ध सबैमा आह्वान गर्नुभएको छ ।

१९ औँ गणतन्त्र दिवसका अवसरमा आज शुभकामना सन्देश दिनुहुँदै राष्ट्रपति पौडेलले मुलुकको स्वतन्त्रता, सार्वभौमिकता, भौगोलिक अखण्डता, राष्ट्रिय एकता, स्वाधीनता, राष्ट्रिय हित र स्वाभिमानलाई अक्षुण्ण राखी दिगो, फराकिलो र समन्यायिक आर्थिक वृद्धि हासिल होस् भन्ने कामनासमेत गर्नुभएको छ । उहाँले स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइमा सुख, शान्ति र समृद्धिको कामनासमेत गर्नुभएको छ । “सङ्घीय लोकतान्त्रिक गणतन्त्रात्मक शासनव्यवस्थाको माध्यमबाट उत्तरदायी र जनमुखी सेवा प्रवाहलाई सुदृढ बनाउँदै सुशासन, विकास र समृद्धिको लक्ष्य प्राप्ति आजको राष्ट्रिय आवश्यकता हो ।

संविधानले परिकल्पना गरेको सामाजिक न्याय, आर्थिक समृद्धि तथा समावेशी विकास हासिल गर्न सबै तहका सरकार, निजी क्षेत्र तथा नागरिक समाजबिच सहकार्य आवश्यक छ” सन्देशमा उल्लेख छ । “आजको यस ऐतिहासिक दिवसले हामी सबै नेपालीबिच आपसी विश्वास, सहकार्य र राष्ट्रिय एकताको भावना अझ सुदृढ हुँदै जाओस् भन्ने कामना व्यक्त गर्दछु” सन्देशमा भनिएको छ ।

लोकतान्त्रिक गणतन्त्र स्थापनाका लागि आफ्नो अमूल्य जीवन उत्सर्ग गर्नुहुने सम्पूर्ण ज्ञात–अज्ञात सहिदप्रति श्रद्धाञ्जली अर्पण गर्दै उहाँले गणतन्त्र स्थापनाका लागि विभिन्न समयमा भएका आन्दोलनको नेतृत्व गर्ने राजनीतिक दलका नेताप्रति सम्मान तथा आन्दोलनमा सहभागी आमनागरिक, जनसमुदाय एवं राजनीतिक कार्यकर्ताको योगदानको प्रशंसासमेत गर्नुभएको छ । यसैगरी उपराष्ट्रपति रामसहाय प्रसाद यादव लगायत बिभिन्न राजनीतिक दलका नेताहरुले पनि गणतन्त्र दिवसको उपलक्ष्यमा शुभकामना दिनुभएको छ ।