helpline khabar

बंगलादेशकी पहिलो महिला प्रधानमन्त्री जियाको ८० वर्षको उमेरमा निधन

6 महिना अगाडी

News by: helpline

Shares: 19

एजेन्सी । बंगलादेशकी पहिलो महिला प्रधानमन्त्री बेगम खालिदा जियाको ८० वर्षको उमेरमा निधन भएको छ।

लामो समयदेखि बिरामी रहनु भएकी जियाको आज मंगलबार ८० वर्षको उमेरमा निधन भएको हो ।

“हाम्री मनपर्ने नेता अब हामी माझ रहिनन्। आज बिहान ६ बजे उनको निधन भयो,“ जियाको बाङ्ग्लादेश नेसनलिष्ट पार्टी (बीएनपी) ले फेसबुकमा लेखेको छ। जिया बंगलादेशमा सन् १९९१ मा पहिलो पटक सरकार प्रमुख बन्नु भएको थियो । उहाँ नै बंगलादेशमा पहिलो महिला सरकार प्रमुख बन्नु भएको थियो ।

२० वर्षमा भएको देशको पहिलो प्रजातान्त्रिक चुनावमा उहाँको नेतृत्वमा बीएनपी विजयी भएको थियो। जिया सन् २००१ मा प्रधानमन्त्री पदमा फेरि फर्किनु भएको थियो र आम चुनावको मुखमा सन् २००६ को अक्टोबर महिनामा उहाँ पदबाट हट्नु भएको थियो ।

बंगलादेशका दिवङ्गत राष्ट्रपति जियाउर रहमानकी पत्नी जिया सन् २०१८ मा भ्रष्टाचार मुद्दामा दोषी ठहर भएपछि पाँच वर्षका लागि जेलमा पर्नुभएको थियो ।

जिया माथि बालबालिकासम्बन्धी एउटा परोपकारी कोषलाई दिइएको रकम हिनामिना गरेको आरोप लगाइएको थियो। उक्त आरोप उहाँले अस्वीकार गर्दै आफूविरुद्धका आरोपहरू राजनीतिक रुपमा प्रेरित रहेको बताउँदै आउनु भएको थियो ।