helpline khabar

बंगलादेशमा पुरानै दललाइ दुइतिहाइ बहुमत,जेनजी समर्थकको ६ सिट मात्रै

5 महिना अगाडी

News by: helpline

Shares: 5

एजेन्सी । बंगलादेशको आम निर्वाचनमा बंगलादेश नेशनलिस्ट पार्टी (बीएनपी) ले दुइतिहाई बहुमत पाएको छ ।

हिजो बिहीबार संसद्का ३ सय सीटका लागि भएको मतदानमा बीएनपीले २०९ स्थानमा जित हासिल गरेको निर्वाचन आयोगले जनाएको छ। यो विजयले पूर्वराष्ट्रपति जियाउर रहमान र पूर्वप्रधानमन्त्री खालिदा जियाका छोरा तारिक रहमानलाई प्रधानमन्त्री बन्ने बाटो खोलिदिएको छ। यो जितसँगै तारिक रहमान बंगलादेशको आगामी प्रधानमन्त्री बन्ने निश्चित भएको छ ।

देशको १२ करोड ७० लाख भन्दा बढी मतदाताहरूले बिहीबार उत्साहपूर्वक मतदान गरेका थिए । यो निर्वाचन केवल नयाँ सरकार छनोटका लागि मात्र नभई देशको भविष्य र संवैधानिक सुधारका लागि पनि महत्वपूर्ण मानिएको छ । सन् २०२४ मा बाङ्ग्लादेशमा तात्कालिन प्रधानमन्त्री शेख हसिना सत्ताच्युत हुने गरी भएको जेनजी आन्दोलनपछि गठित अन्तरिम सरकारले अहिले निर्वाचनमा गराएको हो। तर जेनजी समर्थक दलले भने जम्मा ६ सिट मात्रै हात पारेको जनाइएको छ । यो निर्वाचनले बंगलादेशमा पुरानै पार्टी स्थापित भएको छ ।

यस पटकको निर्वाचनमा ५१ वटा राजनीतिक दलका १ हजार ९ सय ८१ उम्मेदवारहरू चुनावी मैदानमा उत्रिएका थिए । यद्यपि लामो समयसम्म सत्तामा रहेको शेख हसिना नेतृत्वको अवामी लिगलाई निर्वाचन आयोगले प्रतिबन्ध लगाएका कारण यस ऐतिहासिक प्रतिस्पर्धामा उनीहरूको उपस्थिति भने थिएन । मतपरिणामले बंगलादेशमा नयाँ राजनीतिक युगको शुरुवात गरेको विश्लेषण गरिएको छ ।